Eru mannagongdirnar viðvíkjandi Búskapargrunninum broyttar?

Hevur landsstýrið broytt inngjøldini í Búskapargrunnin, uttan at hava broytt lógina? Tað vil Helgi Abrahamsen, løgtingsmaður, hava at vita, og tí hevur hann sett Ruth Vang, landsstýriskvinnu, ein fyrispurning um tað.

Tann 18. september í ár, skrivaði Høgni Hoydal, varaløgmaður, í einum lesarabrævi, at núverandi samgonga, sum tann fyrsta, hevur valt at lata inntøkur av tilfeingisgjøldum og aligjøldum fara beinleiðis í Búskapargrunnin, og orsaka av hesum síggjast tilfeingisgjøldini ikki á fíggjarlógini. Hann samanbar hetta við undanfarin landsstýri, sum, sambært landsstýrismanninum, heldur valdu at brúka allar pengarnar.

Men lógin um Búskapargrunn er ikki broytt síðani 2018, og tí vil Helgi Abrahamsen nú hava at vita, um (ella hvussu) landsstýrið hevur broytt inngjøldini í Búskapargrunnin, uttan at hava broytt lógina.

Hann spyr tí landsstýriskvinnuna hesar spurningarnar:

1. Er tað rætt, sum Høgni Hoydal, varaløgmaður, sigur í einum lesarabrævi, at sitandi samgonga hevur broytt mannagongdina viðvíkjandi inngjøldum í Búskapargrunn Føroya?

2. Verða fleiri pengar fluttir í Búskapargrunn Føroya nú, enn tað sum lógin krevur?
    
3. Hava undanfarin landsstýri goldið minni inn í Búskapargrunn Føroya enn tað, sum lógin kravdi?

4. Á hvønn hátt hevur sitandi landsstýri broytt mannagongdirnar viðvíkjandi inngjøldum í Búskapargrunn Føroya?

5. Er tað rætt, at tað sum verður inngoldið í Búskapargrunn Føroya, fer uttanum landskassan, og tí ikki sæst á fíggjarlógini?

Landsstýriskvinnan skal svara spurninginum í seinasta lagið tann 11. oktober.

Sambandsflokkurin